D Appezeller Isebahne
hend Charakter, gob mers no.
Jedi macht en ääges Zögli,
ali chönnd zor Not devo.
Die vo Herisau-St.Galle
nennt der Setteregump wie Schnopf,
aber die vo Goosse n une
wie ne Wiibli met eme Chropf
chüüchet schuuli.
S Gääserbähnli
nennt der Stecke zwüschet d Bää
ond lod rüüche ond macht Böge,
määnscht, chäämscht nomme lebtig hää.
D Säntisbahn tuet starch plagiere,
henderhältig, lischtig, schlau,
chas äm a der Nase füere
statt i d Berg i d Wasserau.
S Trogenerbähnli lauft wie gschleffe.
Z Vögelinsegg stohd s schief ond chromm,
aber s hebt si met em Tröhtli
am elekterische Strom.
S gliich macht die, wo dei is Rhintel
öber s Schlachtfeld abe gohd.
S' Laufe wör ere sös nüd schade,
aber mengmol fählts am Troht.
S Häädlerbähnli zom Erbarme
rotscht der ganz Weg of de Chneu,
aber s bringt met vollne Arme
Kurgescht hää met Geld wie Heu.
Öber Rhinegg-Walzehuuse
ischt der Bode gääch ond hääl,
möchtid d Kurgescht wider use,
lood mer s abe ame Sääl.
D Appezeller Isebahne
hend Charakter, gob mers no.
Jedi macht en ääges Zögli,
ali chönd zor Not dervo.
Julius Ammann
Erste Fassung von 1922